3. november 2001 UKA 2001/78
Inatsisartuni Naalakkersuisunilu il.il. ilaasortat aningaasarsiaqartitaanerat il.il. pillugit Inatsisartut inatsisissaattut siunnersuut.
(Inatsisartut Siulittaasoqarfiat)
Akissuteqaat
Aappassaaneerineq
Inatsisartut Inatsisit Atortinneqarnerannut Ataatsimiititaliaata isumaliutissiissutaa Siulittaasoqarfimmiit immikkut oqaaseqarfigissallugu pissutissaqanngilaq.
Siunnersuutilli saqqummiunneqartup qanoq paasineqarnissaa pillugu apeqqutialunnguanik saq-qummiussisoqarsimavoq, taakkulu erseqqissaateqarfiginissaat pissusissamisoorluni. Apeqqutit taakku tamakkerlutik Inatsisartuni ilaasortat, aalajangersimasumik Nuummi najugaqalernissamik kissaateqartut inissamik innersuussivigineqartarnissaat pillugu aaqqissuussinermut attuumassuteqarput.
Siulliullugu erseqqissaatigineqassaaq Inatsisartuni ilaasortap inigisimasaminit Nuummi inissamut innersuunneqarfigisaminut pigisaminik nuussinera siunnersuut matumani saqqummiunneqartoq tunngavigalugu akiliussissutigineqartussaanngimmat.
Nangillugu erseqqissaatigineqassaaq inissaq Namminersornerusut pisortanut inigititassatut inner-suuttagaannit innersuunneqartussaasoq, Inatsisartunilu ilaasortaq, inissianit innersuunneqartartunit inissamik atugassiivigineqarsinnaasunut allanut naligititaalluni inissarsiortutut allatsittussaasoq. Inissiani innersuuttaakkani taakkunani inissamut innersuunneqarnissamut utaqqisoqalissagaluarpat Inatsisartuni ilaasortaq pineqartoq inissianut innersuunneqartartunut taakununnga inis-saminik atugassinneqarsinnaalernissami tungaanut utaqqisut allatsissimaffiannut ilanngunneqartussaavoq. Piffissami inissamut innersuunneqarsinnaalernissap tungaanut Inatsisartuni ilaasortaq utaqqiisaasumik inissamik atugassinneqartussaanngilaq.
Siunnersuutip § 1.ia, imm. 6 aamma 7 akornutaasussaanngillat Namminersornerullutik oqartussat nammineq toqqakkamittut inissiap ataatsip attartorneqarnissaa pillugu Inatsisartuni ilaasortamut isumaqatigiissutiginissaa, tassani pineqassalluni piffissaq Inatsisartuni ilaasortatut qinigaaffia, taamatullu tamatuma kingorna piffissaq ilaasortatut tunuarnersiuteqarfia. Namminersornerullutik Oqartussanut ajornaranilu kissaatiginaraangat tamanna illua tungeriinnut tamanut iliornikkut aningaasatigullu iluaqutaasumik kinguneqartussaavoq.
Taamatut oqaaseqarneq immikkut oqallissutaasussatut ilimananngikkaluarluni siunnersuutip pingajussaaneerneqalinnginnerani inatsisiliornermi teknikikkut erseqqissaatigissallugu pisariaqarsinnaammat tamanna isumaliutigineqarumaarpoq.